گئنه بایرام گلیب، گئتدی!
گئنه بایرام گلیب، گئتدی!

«الا، یا ایهاالساقی، ادر کأسا و ناوِل»‌لر! گئنه بایرام گلیب، گئتدی، اورکده قالدی نیسگیل‌لر   هجوم ائتدی ائوه هر دؤرد طرفدن لشکرِ اعدا تهاجم‌دن‌ده چؤخ ووردو خسارت بو تناول‌لر   سؤکولدو آلمانین بؤیرو، دلیندی پوْرتاغال باغری کسیلدی آرمودون نسلی، جهاندان کؤچدو آجیل‌لر   تالاندی خوانِ یغما تک‌ میز اوسته مئیوه- شیرینی صلیبی‌لر کیمی بسکی ائدیب […]

«الا، یا ایهاالساقی، ادر کأسا و ناوِل»‌لر!
گئنه بایرام گلیب، گئتدی، اورکده قالدی نیسگیل‌لر
 
هجوم ائتدی ائوه هر دؤرد طرفدن لشکرِ اعدا
تهاجم‌دن‌ده چؤخ ووردو خسارت بو تناول‌لر
 
سؤکولدو آلمانین بؤیرو، دلیندی پوْرتاغال باغری
کسیلدی آرمودون نسلی، جهاندان کؤچدو آجیل‌لر
 
تالاندی خوانِ یغما تک‌ میز اوسته مئیوه- شیرینی
صلیبی‌لر کیمی بسکی ائدیب حمله بو فامیل‌لر
 
گؤرنده آجیلی، رحم ائتمیر اصلا بو قوْهوم- قارداش
خداوندا! بو «هابیل»لر، نه‌دن اوْلموشدو «قابیل»لر؟!
 
بیر آی بایرامه قالمیش، بسکی عرشه قالخدی قیمت‌لر
بازاردان بوْش قاییتدی سر به سر بیچاره‌ زنبیل‌لر
 
نئجه جمعیّتی ائتسین بو حالدا کنترل انسان؟
مخارجلر! بئله گئتسه، اینان، جوت- جوت دوْغار فیل‌لر
 
مخارج‌ آتلی، آیلیق‌لار پیاده، یوْل یوْخوش، یاران
بو اوضاعین بیانیندا قالیب عاجز بوتون دیل‌لر
 
بو خرجین عُهده‌سیندن هئچ گَلَنمز یُوخسول- اَیلیقچی
مگر دیمدیکلریندن یاغدیرا مینلیک،ابابیل‌لر
 
تعجب ائتمه‌ گر من سالمیرام سس، ائتمیرم ناله
منیم بختیم ائله یاتمیش، اوْیالدانماز صرافیل‌لر